పాయింట్‌ : తనను ప్రేమించిన ఇద్దరు అమ్మాయిల్లో తాను ప్రేమించిన అమ్మాయిని ఏవిధంగా దక్కించుకున్నాడనేది కథ.

'కందిరీగ' కుడితే ఎంత బాధ కల్గుతుందో... ఈ చిత్రం షూటింగ్‌లో ఉండగానే ఇండస్ట్రీకి ఆ బాధేంటో తెలిసింది. కానీ రిలీజ్‌ తర్వాత దాన్నంతా మర్చిపోయేలా చేసింది నిర్మాతకు. అంటే తెలుగు, తమిళ టెక్నీషియన్స్‌ గొడవ చిలికి చిలికి గాలివానలా తెలుగు ఇండస్ట్రీనీ, అటు తమిళ ఇండస్ట్రీని కుదిపేసింది. ఫలితంగా తెలుగు పరిశ్రమ సమ్మెకు దిగింది. ఆ తర్వాత కొంత పరిష్కారం అయినా మళ్ళీ సమ్మె జరగడం, ఇలా రెండు మూడుసార్లు షూటింగ్‌ వాయిదాపడుతూ.. అనుకున్న టైమ్‌కంటే.. ఎక్కువ సమయం పట్టడం, ఖర్చు పెరగడం జరిగింది.

ఇంత జరిగినా తన సినిమాపై నమ్మకంతోనో ఏమోగానీ.. ఈ చిత్రం విడుదల తర్వాత సక్సెస్‌ ఊహించని విధంగా ఉంటుందని తెలిసిన నిర్మాత బెల్లంకొండ సురేష్‌ కృష్ణా, ఉభయగోదావరి జిల్లాల్లో అమ్మకాలు జరిగినా వారి దగ్గర నుంచి ఎక్కువ ధరకు తిరిగి తీసుకున్న ఘనత ఆయనకే దక్కింది. ఇదేదో పిచ్చితనంగా అనిపించినా సినిమా విడుదల తర్వాత ఎటువంటి ప్రేక్షకుడైనా చూసి మెచ్చుకునేలా దర్శకుడు బాగా తీర్చిదిద్దాడు.

ఈమధ్య ఏ కుర్ర హీరో సినిమా చూసినా.. అందులోనూ రామ్‌ చిత్రాలు పరిశీలిస్తే... పెళ్లయిన లేక పెళ్ళికాబోతున్న అమ్మాయిని కిడ్నాప్‌ చేయడంతో ఆరంభమవుతుంది. సరిగ్గా కందిరీగలో కూడా శ్రీను (రామ్‌) తనుండే అనకాపల్లిలో పెళ్ళి జరుగుతున్న ఓ అమ్మాయిని తనింటికి తీసుకువస్తాడు. ఎందుకంటే.. తనకు పెళ్లీడు వయస్సు వచ్చినా తల్లిదండ్రులు చంద్రమోహన్‌, సనలు పెండ్లి చేయకపోవడంతో శీను ఇచ్చిన ట్విస్ట్‌ అది. దీన్నిబట్టి శీను డేరింగ్‌ క్యారెక్టర్‌ అనీ, తన తెలివితేటలతో ఎంతటివాడినైనా బుట్టలో వేసేస్తాడనీ దర్శకుడు చెప్పాడు.